Ойуунускай ааҕыылара

ogoyukin

Балаҕан ыйын 7-8 күннэригэр Таатта улууһун Чөркөөх сэлиэнньэтигэр, Былатыан Ойуунускай төрөөбүт алааһыгар Муҥха Дэлбэрийбиккэ, Чөркөөх түмэллэригэр, оскуолатыгар уонна уһуйааныгар, икки күннээх киэҥ далааһыннаах саха олоҕун-дьаһаҕын, үлэтин, үөрэҕин сайдыытын түстүүр түһүлгэлэрэ тэрилиннилэр. Таатта иитэр-үөрэтэр эйгэтэ дьиҥ сахалыы, үйэлэри уҥуордаабыт, кэрэни кэрэһэлээбит үгэстэрэ хас да хайысханан тэриллэн үлэлээтилэр. Тыл алыптаах күүһүнэн тыыннаммыт, Олонхо дорҕоонноох тойуга тохтообокко кутулунна, кэлбит ыалдьыт уу хараҕынан сэргэҕэлээтэ, эт кулгааҕынан истэн “Ноо!” диэн сэҥээрдэ.

“Ойуунускай ааҕыылара” оҕо аймаҕы кэрэ айылҕалаах, ураты тыыннаах түһүлгэлэргэ төрөөбүт алааһыгар муста, онтон ИИС.УУС.АС эйгэтигэр улахан дьоннуун оҕолуун омук сатабылыгар күөн күрэс түһүлгэтигэр кытыннылар. Ол курдук Нерюнгри, Дьокуускай куораттан, Амма, Уус-Алдан, Нам, Чурапчы, Хаҥалас, Мэҥэ-Хаҥалас, Томпо, Өймөкөөн, Анаабыр, Үөһээ Бүлүү, Кэбээйи, Халыма, Орто Халыма, Горнай, Уус Майа, Ленскэй, Ньурба, Бүлүү, Таатта-уопсайа барыта 2739 киһи кыттыыны ылла.

Аһыллыы сиэригэр туомугар СР Үөрэххэ уонна наукаҕа миниистирэ И.П.Любимова, ааҕыылары төрүттээччилэртэн биирдэстэрэ СР үтүөлээх үлэһитэ Е.П.Чехордуна, ыҥырыылаах ыалдьыттар мустубут дьону эҕэрдэлээтилэр, үтүөнү түстээтилэр.

Республикабыт араас муннугуттан, 14 улуустан, куораттартан 500 чэкэ кыттааччы оҕо, үтүмэн элбэх салайааччылар, учууталлар, общественность тоҕуоруһа муһуннулар.

Ааҕыылары тэрийээччилэр: үөрэх уонна наука министерствота, » Барҕарыы» национальнай фонда, » Кэскил» оҕо издательствотын кыһата, «Таатта сайдар эйгэтэ» кластер.

Москваттан ВООПИИК салайааччыта Артем Геннадьевич Демидов Дальнай Восток уонна Сибиир коллегаларын- Алтай, Бурятия, Хакасия республикаларыттан, Забайкальеттан, Магадан, Камчатка, Приморскай, Новосибирскай, Омской, Томскай, Еврейскай автономнай, Сахалин областартан уонна Москваттан кэлбит ыалдьыттары, общественниктары кытары төгүрүк остуол ыытта. Чөркөөх түмэлин улаханнык сөхпүттэрин бэлиэтээтилэр. Музейга форуму көрөн астыннылар. Инникитин музей заповедник буолуу, көмөлөөн граҥҥа кыттыы боппуруостарыгар кэпсэтиилэр буоллулар.

Поделиться: