Балаҕан ыйын 29 к. сахалыы тылынан өрөспүүбүлүкэтээҕи “Барҕарыы” кэмпириэнсийэни тэрийэр туһунан бастакы Сүбэ мунньах буолла.
Кыттыыны ыллылар: “Барҕарыы” пуондаттан А.И.Поисеева, М.А.Кириллина, Өрөспүүбүлүкэтээҕи лицей-интернат дириэктэрэ И.И. Шамаев, Дьокуускай куораттааҕы национальнай гимназия, Саха гимназия, “Айыы кыһата” национальнай гимназия, Саха политехническай лицей, Дьокуускай куорат 2 №-дээх оскуолатын дириэктэри солбуйааччылара, учууталлара.
«Барҕарыы» кэмпириэнсийэ сыала – чинчийэр үлэ нөҥүө оҕо айар, ырытар, анаарар дьоҕурун, сахалыы саҥарар-толкуйдуур сатабылын сайыннарыы. Кэмпириэнсийэҕэ 7-11 кылаас үөрэнээччилэрэ кытталлар.
Мунньах түмүгүнэн кэмпириэнсийэ хайысхалара, буолар күнэ-дьыла чопчуланна, Тэрийэр сүбэ састааба ананна. Улуустааҕы, куораттааҕы түһүмэҕи улуустааҕы, куораттааҕы үөрэҕирии салаата 2023 сыл сэтинньи ыйтан 2024 сыл тохсунньу ыйга диэри тэрийэр. Өрөспүүбүлүкэтээҕи түһүмэҕи 2024 сыл олунньу ыйыгар Тэрийэр сүбэ ыытар.
Дьокуускай куорат сахалыы тыллаах оскуолалара, кылаастара аан бастакытын ыытыллар өрөспүүбүлүкэтээҕи «Барҕарыы» кэмпириэнсийэ тэрээһинигэр, үлэтигэр кыттарга бэлэмнэрин биллэрдилэр.