Н.В. Петров аатынан Дьабыыл орто агропрофилированнай хайысхаллаах оскуолатын иhинэн сылын аайы тэриллэн үлэлиир улуустааҕы «ИЛГЭ» үлэ-сынньалаҥ лааҕырын үһүс сезона от ыйын 17 күнүттэн от ыйын 30 күнүгэр диэри үлэлээбитэ. Лааҕыр Дьабыыл нэһилиэгиттэн 12 км сиргэ сытар «Чаачыгый» диэн кэрэ көстүүлээх сиргэ баазаланан олорор. Бу сезоҥҥа начальник – Аммосова Ф.Р., баспытааталларынан – Попова А.П., Семенова Н.Н., баһаатайдарынан – Аммосова Р.С., Свешникова А.С., мед. үлэһитинэн – Борисова В.Р. састааптаах үлэлээтибит. Биhиги лааҕырбыт сүрүн сыала-соруга – оҕо сайыҥҥы сынньалаҥын туhалаахтык атаарыытын тэрийии, тыа сирин сүрүн дьарыгар, ынах-сүөһүнү көрүү-истии сатабылларыгар сыһыарыы уонна үөрэтии. Улууспут араас нэhилиэктэриттэн уопсайа 25 оҕо хабылынна (5-11 кылаас).
Үһүс сезон иитэр-үөрэтэр сүрүн хайысхатынан оҕону төрөөбүт тылыгар угуйуу, саха омук төрүт дьарыктарын, ырыатын-тойугун үөрэтии буолар. Ол курдук сезон устата оҕолорго араас хабааннаах дьарык былааннанан ыытылынна:
- Сарсыарда, киэһэ оҕолор бөлөхтөргө арахсан хотон үлэтигэр көмөлөстүлэр: ньирэйдэри мэччирэҥтэн хомуйан аҕалан, титииккэ хаайаллар, титииги ыраастыыллар уонна ынахтары ыамҥа үүрэн киллэрэргэ көмөлөстүлэр.
- Сылгы сиэлиттэн салама быатын хатыыга үөрэннилэр.
- Ньирэйдэргэ быа, ынахтарга кыаһы өрдүлэр.
- Саха норуотун ырыатыгар, тойукка, хомуска, оһуохайга аналлаах дьарыкка сырыттылар.
- Оҕуруокка уу куттулар (5 теплицаҕа оҕурсу, помидор, перец уонна тас өттүгэр кабачок, сүбүөкүлэ, укроп).
- Хортуоска бааһынатын сыыһын ыраастаатылар, ардах кэннэ көмтүлэр.
- Күн аайы лааҕыр сирин-уотун көрөн хомуйаллар.
Сезон бүтүүтүгэр оҕолор сылгы сиэлиттэн саламаны оҥорон түмүктээтилэр, норуот тылынан айымньытынан биир толору нүөмэри отчуоттуур кэнсиэргэ туруордулар. Оҕолор 14 хонуктаах лааҕырбыт үһүс сезонугар иҥэриммит сатабыллара, билиилэрэ инники олохторугар туһалаах буолуо диэн эрэнэбит.